التمييز الملحوظ
السلام عليكم ورحمة الله وبركاته
درس النهاردة عامل مشكلة لطلبة كتير اوي .. انا كنت زمان منهم مثلا :-) .. درس النهاردة هو التمييز .. بس أحب اطمنكم الدرس ده حلووو و سهل جدا .. احنا بس اللي مكبرين الموضوع :-D يلا نبدأ .
بسم الله الرحمن الرحيم و الصلاة و السلام على خاتم المرسلين سيدنا محمد .
التمييز ... قالوا هو كلمة نكرة جامدة تزيل ابهاما .... بس هل التمييز بس هو اللي بيزيل الإبهام ؟ لا مش التمييز بس فاعرف كويس انه مش معنى أن كلمة ازالت ابهام تبقى تمييز ماشي ؟ ... تمام كدة ... هنقول شوية حاجات كدة عن التمييز لازم تعرفها هتفيدك و بعد كدة هقولك الخلاصة بردو و تريح نفسك خالص :-) .
-انواع التمييز
1- طابت مصر هواءا .
2- حسن محمد خلقا .
3- فجرنا الأرض عيونا.
4- ما أجمل الربيع فصلا .
5- أحب الفتاة رقيقة قلبا .
6- هو كريم خلقا .
الجمل دي كلها فيها أول نوع للتمييز الملحوظ و اسمه تمييز محول .. يعني ايه تمييز محول ؟ هشرحه في الأمثلة دي :-) :-
1- طابت مصر هواءا .
مش ممكن نحول الجملة دي ل ( طاب هواء مصر ) ؟ ايون خلاص تبقى تمييز ... شفت حولناها و المعنى فضل ثابت . و عشان كده بنسميه محول .. و كلمة هواء لما حولناها بقي اعرابها فاعل .. فبنسميه محول عن الفاعل .
2- حسن محمد خلقا .
ممكن نخليها حسن خلق محمد ... تبقى تمييز بردو . لأننا قدرنا نحولها ... و كمان بقى إعراب خلق فاعل .. فده بردو اسمه محول عن الفاعل .
3- فجرنا الأرض عيونا.
ممكن نحول الجملة و تبقى (فجرنا عيون الأرض ) ... فتبقى عيونا تمييز .. و كمان بقى اعرابها مفعول به ... فنقول تمييز ايه المرادي ؟ ... هنقول تمييز محول عن المفعول .. تمام كدة :-D .
4- ما أجمل الربيع فصلا .
ممكن نحولها و نقول ( ما أجمل فصل الربيع ) .. تبقى تمييز بردو و حولناها من المفعول .. فيبقى نوعه محول عن المفعول .
5- احب الفتاة رقيقة قلبا .
دي اسطمبة النعت السببي فاكر لما قلنا أي نكرة منصوبة بعد اسطمبة النعت السببي تتعرب تمييز .. لو نسيت ده ياريت تقرأ درس النعت السببي التاني ... و عموما ممكن نحولها بردو و نقول ( أحب قلب الفتاة رقيقا ) .. تبقى تمييز و بقى اعرابها مفعول فيبقى نوعه محول عن المفعول .
6- هو كريم خلقا .
بردو اسطمبة النعت السببي .. و ممكن بردو نحولها ل( خلقه كريم ) .. فتبقى تمييز و بقى اعرابها مبتدأ فيبقى نوعه محول عن المبتدأ .
-تنبيهات
في حاجات كدة لازم تبقى عارفها كويس زي :-
1- أي نكرة منصوبة بعد أسلوب التعجب سواء هي مفرد أو مثنى أو جمع بتتعرب تمييز ... مش ضروري تكون مفرد يعني تمام ؟ ... يبقى لو قلنا ( أجمل بعمر و أحمد طالبين ) ( ما اعظمهن طالبات ) ( ما أعظمهما سلاحين العلم و الإيمان ) ... إعراب ( طالبين - طالبات - سلاحين ) كلهم تمييز .
2- مش كل مشتق وراه نكرة منصوبة يبقى اسطمبة نعت سببي .. لو قلنا يا زيدي مثلا ( رايتك آكلا موزا ) ... اوعى تتسرع زي التانيين و تقول موزا تمييز .. تؤتؤ .. اسطمبة النعت السببي بتوصف حاجة في الموصوف ( رايتك آكلا موزا ) ما عملتش كدة و كمان لو اتنططت مش هتعرف تحولها و تبقى تمييز محول ... موزا اعرابها مفعول به ( شرحناها في إعمال المشتقات ) .. أما لو قلنا ( رايتك راجحا عقلا ) ايووون شطور انتا :-) .. دي اسطمبة النعت السببي وصفت حاجة في الموصوف أهي فتبقى عقلا تمييز .. و شايف انتا سهل تحولها ازاي ينفع تقول ( رأيت عقلك راجحا ) .
3- التمييز المحول ليه تلات أنواع بس ( محول عن الفاعل - محول عن المفعول - محول عن المبتدأ ) .. مافيش حاجة اسمها محول عن مضاف إليه مثلا و لا محول عن اسم مجرور عيب ما تقولش كدة مهما حصل هتضحك المصحح عليك :-D... تمام .
4- اسم التفضيل و النكرة اللى بعده .. هنتكلم عنها في الآخر خالص ما تستعجلش هديك العصارة دا وعد :-)
.............................................
قلنا التمييز المحول ليه تلات أنواع ( محول عن الفاعل و المفعول و المبتدأ ) ... طب لو عرفنا نحول بس ما كانش محول عن التلاتة دول أو لو ما عرفناش نحول اصلا .. نعمل ايه ساعتها ها ؟ نلطم ولا نعمل ايه ؟ لا يا زيدي في الحالات دي بيبقى النوع التاني من التمييز و ع فكرة دا النوع السهل بقى ... دا ليه أشكال معينة بيجيش غيرها هقولك ايه و اقولك علامتها كمان قشطة ؟ .. نبدأ بقى :-D :-
1- أعظم بمحمد رسولا .
2- أبشع بهم رجالا .
3- كفى بالله وكيلا .
4- عظمت فتاة .
5- لله دره فارسا .
6- كم جنود ماتوا في الحرب .
الأنواع دي كلها ينفع نحط ( من ) قبل الكلمة اللي احنا شاكين انها تمييز . لو المعنى ما اتغيرش تبقى تمييز ... تمام تعالوا نشوف كدة .
( أعظم بمحمد من رسول - أبشع بهم من رجال - كفى بالله من وكيل - عظمت من فتاة - لله دره من فارس - كم من جنود ) .
المعنى لسا زي ما هو يبقوا كلهم تمييز ... دا التمييز الغير محول كدة التمييز الملحوظ خلص :-) بس في كام تنبيهاية كدة :-
1- لو جالك سؤال ( لله دره من فارس ) و طلب إعراب فارس .. اوعى تقول فارس اسم مجرور .. تؤتؤ هنا فارس اعرابها تمييز بردو بس بنقول تمييز مجرور ... و كذلك باقي الأشكال اللي قلناها .. يبقى ايه بقى؟ يبقي التمييز ممكن يبقى مجرور لو جه قبله حرف الجر ( من ) . انا قلت ( من ) بس ها ؟ تمام كدة .
2- كم الاستفهامية و كم الخبرية ... لما ييجي سؤال يقول وضح نوع كان هو بنبص لحاجة واحدة بس ( نوع التمييز )
- لو التمييز مفرد منصوب على طول كم استفاهمية ( كم جنديا مات في الحرب ؟ ) ( كم ولدا تملك ؟ ) و هكذا .
- لو التمييز جمع تبقى كم الخبرية زي ( كم جنود ماتوا في الحرب . ) .. ( كم أولاد تملك . ) و هكذا
ملحوظات :-
1- كم الاستفهامية لو جه قبلها حرف جر زي الباء أو ( في ) أو أي حرف جر التمييز بيبقى ليك انك تقول أنه تمييز مجرور و ليك انك تقول أنه تمييز منصوب.. فلو قال ( بكم جنيه ) ما حطش الألف اللي هي دليل النصب يبقى تمييز مجرور .. ولو قال (بكم جنيها ) حط الالف اللي دلت ع النصب تبقى تمييز منصوب .. لو ما بينش زي ( إلى كم جملة نظرت ) ينفع تقول أي إعراب الاتنين الصح و ممكن تقول الاتنين عادي ساعتها .. بس لو قال بكل وجه ممكن يبقى لازما تقول الأعرابين طبعا .
2- تمييز كم الخبرية مجروور مش منصوب .
3- لازما يجيبلك تمييز بعد كم .. ما تتصورش ابدا انه هيجيبلك بين نوع كم و يقول ( كم عشنا في هذه الأرض ) ... لازم يحط تمييز بعد كام . فما تقلقش من ده .
4- كم الاستفهامية تمييز نسبة زي تمييز العدد و المقادير كدة مش تمييز ملحوظ غير محول فما ينفعش نطبق قاعدة حرف الجر ( من ) عليها .
اسم التفضيل
التمييز و المضاف إليه بعد اسم التفضيل فيه شكلين عايز أتكلم معاك عليهم عن التمييز اللي بعد اسم التفضيل ... شكل سهل يتلاحظ و شكل تاني حويط و ده اللي هنرغي فيه و هيبقى سهل بردو بإذن الله :-) .
- الشكل الأول :-
محمد أفضل خلقا .
محمد أفضل ولد .
انت أشد استغلالا من غيرك .
لا بد أن تستغلني أشد استغلال .
هو أكثر علما .
علمه أكثر علم .
ببساطة خالص النوع ده لو فيه الألف اللي بتدل ع النصب يبقى تمييز لو ما فيش الألف يبقى مضاف إليه ... عشان كده ( خلقا - استغلالا - علما ) تمييز ... أما ( ولد - استغلال - علم ) مضاف إليه ...دا شكل واضح و سهل :-) ندخل ع الجد بقى .
-الشكل التاني :- الشكل ده الكلمة ما ينفعش يبقى آخرها الألف اللي بتدل ع النصب عشان الكلمة بيبقى ءاخرها تاء مربوطة أو الف مقصورة ( الياء اللي بتتنطق الف زي كبرى مستشفى معنى ) .. فبالتالي الكلمة النكرة اللي احنا شاكين فيها مش قادرين نعرف هي تمييز و لا مضاف إليه مثلا يعني :-
1- " السلام عليكم " اسمى تحية .
2- "السلام عليكم " اسمى معنى .
3- إن " 57357 " أفضل مستشفي .
4- أن " 57357" أفضل مهارة .
5- " في الحلال " أجمل رواية .
6- " في الحلال " أجمل غاية .
تايه صح ؟ .. أطمن جدا هقولك طريقتين تعرفهم بيها :-) أي خدمة مظبطك انا عارف ;-) ... نبدأ بقى :-
- الطريقة الأولى طريقة معقول و مش معقول ... دي طريقة النحاة قالو عليها بس مش مسميينها كده طبعا ... نشرحها ع الأمثلة احسن .
1- "السلام عليكم" أسمى تحية .
ينفع نقارن "السلام عليكم " بأي تحية تاني ؟ ايووون طبعا معقول ... طالما معقول يبقى ( تحية ) مضاف إليه
2- " السلام عليكم " اسمي معنى .
ينفع نقارن السلام عليكم بمعنى ؟ حاجة مش منطقية ... طالما هي مش منطقية يبقى ( معنى ) تمييز .
3- ان " 57357 " أفضل مهارة .
ينفع نقارن 57357 بمهارة ؟ حاجة عبيطة صح مش جاية ... طالما كدة تبقى ( مهارة ) تمييز .
4- ان " 57357 " أفضل مستشفى .
ينفع نقارن 57357 بمستشفى تاني ؟ اه ده معقول ينفع ... خلاص تبقى ( مستشفى ) مضاف إليه .
5- " في الحلال " أجمل رواية .
ينفع نقارن رواية ( في الحلال ) برواية تانية ؟ أه مقارنة مقبولة يبقى ( رواية ) مضاف إليه .
6- " في الحلال " أجمل غاية .
ينفع نقارن " في الحلال " بغاية ؟ لا ما ينفعش ... تبقى تمييز .
- تاني طريقة طريقتي :-D
( طريقة حرف الجر في ) في الأمثلة الجاية دي :-
1- شيماء أكثر حلاوة ... ينفع نقول شيماء أكثر في الحلاوة ؟ .. الجملة لايقة و معقولة ... خلاص يبقي تمييز .
2- شيماء أجمل فتاة ... ينفع اقول شيماء أجمل في الفتاة ؟ ... لا مش لايقة خالص ... خلاص يبقي مضاف إليه .
3 - " السلام عليكم " أسمى تحية ... ينفع نقول " السلام عليكم" أسمى في التحية ؟ ... لا مش لايقة خلاص مضاف إليه .
4 - "السلام عليكم" اسمي معنى .. ينفع نقول السلام عليكم اسمي في المعنى؟ .. اه لايقة .. خلاص تبقي تمييز .
الخلاصة :-
لايقة >> تمييز .
مش لايقة >> مضاف إليه .
طبق الطريقة دي على باقي الأمثلة هتلاقيها زي الفل .
و أصل كل الطرق أن وجه التفضيل تمييز و المفضل عليه مضاف إليه . دي أو فهمتها تبقى تماااام
آخر حاجة عن الموضوع ده :-
- لو اسم التفضيل معرف ب( ال ) النكرة اللى بعده تمييز من غير تفكير ..
مصر الأفضل دولة .
انت الأفضل رجلا .
انت الأعلى خلقا .
( دولة - رجلا - خلقا ) كلهم تمييز .
حمد الله ع السلامة التمييز خللللص :-D .
و الخلاصة بالنسبة للثانوية بقى :-
1- أي نكرة منصوبة بعد الافعال دي ( طاب جمل حسن اشتد امتلأ ملأ اشتعل ازداد عظم فقم فاض حسب كفى ) تبقى تمييز .
2- أي نكرة منصوبة بعد أسلوب المدح و الذم و اسلوب التعجب تتعرب تمييز .
دا بالنسبة للثانوية .
انتهينا :-) لو في اي حتة مش مفهومة يا ريت تقولي دا مهم جدا عندي ... و عارف ان الدرس طووول بس حبيت اقول كل حاجة عن التمييز عشان نرتاح منه خالص . يلا بالتوفيق :-) .
سلام عليكم .