📁 آخر الأخبار

المفعول معه بستطهالك


المفعول معه بسطتهالك



لو بصينا في الأمثلة دي: 

                                 1- استيقظ النائم وأذان الفجر.

                                 2- مشيت وشاطئ النيل.

                                 3- سار القطار وخط السكة الحديد.

                                 4- ذهبت إلى المدرسة وطلوع الشمس.


- في المثال الأول (استيقظ النائم وأذان الفجر) ... مستحيل الواو تبقي واو عطف ... لأنها لو واو عطف هيبقي المعني ان النائم استيقظ وكمان الفجر استيقظ !! ... دي مش واو عطف ... دي حاجة جديدة اسمها واو المعية واللي بييجي بعدها اسمه مفعول معه ... وده موضوع الدرس ... واو معية يعني معني الجملة (استيقظت مع أذان الفجر) حشنا الواو وحطينا بدالها (مع) ... طالما المعني فضل سليم تبقى دي واو معية واللي بعدها مفعول معه ... وكدة يبقى اعراب (استيقظ النائم وأذان الفجر) ... (وأذان الفجر) الواو واو معية ... أذان مفعول معه منصوب بالفتحة ... الفجر مضاف إليه.


- في الأمثلة الباقية (مشيت وشاطئ النيل) – (سار القطار وخط السكة الحديد) – (ذهبت إلى المدرسة وطلوع الشمس) ... نفس الكلام الواو مستحيل تبقي واو عطف لنفس سبب المثال الأول ... وكمان ينفع نشيل الواو ونحط بدالها (مع) ويفضل المعني سليم ... فكدة تبقي (شاطئ – خط – طلوع) مفعول معه منصوب بالفتحة.


- واو المعية ليه تلات شروط ... أولهم إنها تكون بمعنى (مع) ... ثانيهم إن ييجي بعدها اسم صريح ... ثالثهم إنها تيجي بعد الفعل أو حاجة مشتقة من الفعل زي (أنا مسافر والفجر).


الفرق بين واو المعية وواو الحالية 

1- واو المعية : يأتي بعدها اسم (مضاف ومضاف اليه – نعت ومنعوت ... الخ الخ) ... ولا يأتي بعدها جملة (مبتدأ وخبر- فعل وفاعل) ... ويمكن استبدالها ب (مع) ... زي (جئت وهطول المطر) – (ذكرتك وتوديع النهار) – (رحلت وشروق الشمس) .... هنا (هطول المطر – توديع النهار – شروق الشمس) دول كلهم أسماء عشان كدة إعراب (هطول – توديع – شروق) مفعول معه منصوب بالفتحة.


2- واو الحالية : يأتي بعدها جملة ... ولا يمكن استبدالها ب (مع) ... زي (جئت والمطر يهطل) – (ذكرتك والنهار مودع) – (رحلت والشمس مشرقة) ... هنا (المطر يهطل – النهار مودع – الشمس مشرقة) دول كلهم جمل كم مبتدأ وخبر عشان كدة كلهم جمل اسمية في محل نصب حال.

تعليقات