الجملة الاسمية والفعلية للصف الرابع الابتدائي

الجملة الفعلية والاسمية

 وصل الجملة الاسمية والفعلية لابنك في رابعة بسهولة

الجملة الاسمية ، والجملة الفعلية ، بيتان ولاد أعمام

بيت الجملة الاسمية ، فيه الأولاد ( المبتدأ والخبر )

المبتدأ بنعرف به الجملة الاسمية ، ولد هادي الطباع مش بيحب الشغب، علشان كدا مكانه معروف في أول الجملة الاسمية مش بيروح مكان تاني.

الخبر هو الولد المشاغب ، قرد البيت ، مش ثابت في مكانه ، ممكن تلاقيه بعد المبتدأ مباشرة ، أو بعده بشوية ، أو بعده بشويتين ، المهم علشان تعرفه : هتلاقيه هو اللي يكمل معنى الجملة الاسمية.

بيت الجملة الفعلية ، فيه ( الفعل والفاعل ..... )

الفعل هو الولد الهادي الطباع وبنعرف به الجملة الفعلية ، مكانه ثابت في أول الجملة الفعلية مش بيتغير.

الفاعل هو الولد المشاغب ممكن تلاقيه بعد الفعل مباشرة أو يلعب بعيد عن الفعل بشوية ، مع شقاوته لكنه لازم يكون داخل البيت مش بيخرج منه ، لأنه هو اللي بيقوم بعمل الفعل كله.

وبيت الجملة الفعلية ، فيه ابن ثالث ( المفعول به ) لكنه بيغيب كتثير خارج البيت ، يعني لو رحت بيت الجملة الفعلية أحيانًا هتلاقيه وأحيانًا لأ.